पाठ्यपुस्तक नपुगेपछि अदालतमा रिट

कर्णालीपत्र संवाददाता २९ फाल्गुन २०७६, बिहीबार १३:४७

जुम्ला, कर्णाली प्रदेशका हिमाली जिल्ला हुम्ला, डोल्पा, कालीकोट, मुगु र जुम्लामा शैक्षित्र सत्र शुरु भएको तेस्रो सातासम्म विद्यालयमा पाठ्यपुस्तक नपुगेपछि उच्च अदालत सुर्खेत, जुम्ला इजलासमा रिट दायर गरिएको छ । नेपालको संविधानको धारा ४६÷१४४ (१) (२) बमोजिम परमादेशको आदेश जारी गरी पाऊँ भनी रिट दायर गरिएको छ ।

साबिकको कर्णाली अञ्चलका जिल्लामा शैक्षिक सत्र शुरु भइसक्दा पनि पाठ्यपुस्तक नपुगेको समाचार मूलधारका राष्ट्रिय पत्रपत्रिकामा समाचार प्रकाशन भएपछि अनौपचारिक क्षेत्र सेवा केन्द्र (इन्सेक) कर्णाली प्रदेश कार्यालय सुर्खेतले अदालतमा नेपालको संविधानबमोजिम ‘परमादेशको आदेश जारी गरी पाऊँ’ भनी रिट दायर गरेको हो । कर्णाली प्रदेशका हिमाली जिल्लामा नयाँ शैक्षिक सत्र शुरु भए पनि विद्यार्थीले फागुनको तेस्रो सातासम्म पुस्तक पाउन नसकेको समाचार प्रकाशित भएकाले नेपालको संविधान र नेपाल कानूनले काम कर्तव्य र अधिकार तोकिदिएका विपक्षीलाई अन्तरिम आदेशसहित परमादेशको आदेशलगायत उक्त जिल्लाका सामुदायिक विद्यालयमा अध्ययनरत विद्यार्थीको शिक्षासम्बन्धी हक र बालबालिकाको हक प्रचलन गरी पाऊँ भन्ने दायर रिटमा उल्लेख गरिएको छ  । कर्णाली प्रदेशका हिमाली जिल्लामा माघ २५ देखि मंसिर मसान्तसम्म शैक्षिक सत्र सञ्चालन हुने गर्दछ ।

इन्सेकले शिक्षा, विज्ञान तथा प्रविधि मन्त्रालय सिंहदरबार काठमाडौँ, शिक्षा तथा मानव स्रोत विकास केन्द्र सानोठिमी भक्तपुर, राष्ट्रिय पाठ्यक्रम विकास तथा मूल्याङ्कन परिषद् र जनक शिक्षा सामग्री केन्द्र सानोठिमी भक्तपुरलाई विपक्षी बनाएर बुधबार रिट दायर गरेको हो । त्यसैगरी विपक्षीमा मुख्यमन्त्री तथा मन्त्रिपरिषद्को कार्यालय कर्णाली प्रदेश, प्रदेश सामाजिक विकास मन्त्रालय र प्रदेश शिक्षा विकास निर्देशनालय रहेका छन् । हिमाली जिल्लामा नयाँ शैक्षिक सत्र शुरु भएको एक महिना बित्न लाग्दासमेत सामुदायिक विद्यालयमा पाठ्यपुस्तक पुग्न नसकेको समाचार प्रकाशन भएपछि रिट दायर गर्नु परेको इन्सेक कर्णाली प्रदेश संयोजक नारायण सुवेदीले बताए ।

अधिकांश विद्यालयमा पाठ्यपुस्तक नपुग्दा पठनपाठन प्रभावित हुने गरेको र विद्यार्थीहरु खाली हात स्कुल जाने गरेको विद्यालयले बताएका छन् । जुम्लाको हकमा सामान्यतः अरू कक्षाको
पाठ्यपुस्तक पुगे पनि सिंजा गाउँपालिकास्थित कैलाश मावि फुङग्रका प्रधानाध्यापक विष्णुलाल रोकायाका अनुसार कक्षा १ को पाठ्यपुस्तक छापिएर नआएका कारण विद्यार्थीलाई वितरण गर्न नसकिएको हो । समयमा पाठ्यपुस्तक नपुग्ने र शिक्षकको पनि लगनशीलता प्रभावकारी नदेखिएकाले शैक्षिक सत्रभरि पाठ्यक्रम सम्पन्न नहुँदै कर्णालीका विद्यार्थीले वार्षिक परीक्षा दिनुपर्ने अवस्था रहेको छ ।
त्यसैगरी जुम्लाका विद्यार्थी विपन्नलक्षित छात्रवृत्ति पाउनबाट पनि गत आर्थिक वर्षमा वञ्चित भएका थिए ।

Leave a Reply

Your email address will not be published. Required fields are marked *

Next Post

E-paper (2076-11-30)

२९ फाल्गुन २०७६, बिहीबार १३:४७