महरा जेल चलान

कर्णालीपत्र संवाददाता १९ कार्तिक २०७६, मंगलवार ०९:४५

कर्णालीपत्र
काठमाडौं, १८ कात्तिक । संसद् सचिवालयकी कर्मचारीलाई बलात्कार गरेको र प्रतिकार गर्दा शारीरिक हिंसा गरेको अभियोग लागेका पूर्वसभामुख कृष्णबहादुर महरालाई जिल्ला अदालत काठमाडौंले पुर्पक्षका लागि थुनामा पठाएको छ ।

अदालतले उनलाई डिल्लीबजार कारागारको थुनामा राख्न आदेश दिएको श्रेस्तेदार आनन्द श्रेष्ठले बताए । हिरासतमा रहँदा महरालाई थापाथलीस्थित नर्भिक अस्पताल बसिरहेका थिए । उनलाई अब अस्पताल पठाउने कि थुनामै राख्ने भन्ने डिल्लीबजार कारागारले नै तय गर्नेछ । सोमबार जिल्ला न्यायाधीश सुदर्शनराज पाण्डेको इजलासले उनलाई थुनामै राखेर मुद्दा अघि बढाउन आदेश गरेको हो । तत्काल प्राप्त प्रमाण हेर्दा महरालाई थुनामै राखेर मुद्दाको पुर्पक्ष गर्नुपर्ने देखिएको पाण्डेको इजलासले निष्कर्ष निकालेको श्रेस्तेदार श्रेष्ठले बताए ।

प्रहरीले बुझाएको प्रतिवेदनपश्चात् सरकारी वकिल कार्यालयले उनलाई जबर्जस्ती करणी अभियोगमा बिहीबार अदालतमा मुद्दा दायर गरेको थियो । महरालाई थुनामा पठाएर मुद्दा अघि बढाउने वा थुनामुक्त गरेर भन्नेबारे जिल्ला अदालत काठमाडौंमा आइतबारदेखि बहस शुरू भएको थियो । महराको बयान गत शुक्रबार सकिएको थियो । बयानमा उनले पीडितको घर नजिकै पुगेको तर पीडितलाई भने नभेटेको बताएका थिए ।

असोज १२ गते राति महरा आएर पहिले रक्सी खाएको त्यसपछि बलात्कार प्रयास गरेको रोशनीले प्रहरीलाई भनेकी थिइन् । ‘प्रहरीलाई भनिदिन्छु,’ भनेपछि महरा हतारहतार निस्किएको शाहीले भोलिपल्ट पत्रकार अजयबाबु सिवाकोटीसँगको भिडिओ अन्तर्वार्तामा पनि बताएकी थिइन् । त्यसरी हतारहतार निस्किँदा कोठामै छुटेका जुत्ताको तलुवा, फुटेको चस्माको एउटा सिसा र चस्माको भाँचिएको खुट्टा प्रहरीले बरामद गरेको थियो । महराले आफूलाई बलात्कार गर्न खोजेको नमानेपछि कुटपिट गरेको र त्यसपछि आफूले प्रहरीलाई बोलाएर सबै कुरा भनेको भन्दै रोशनीले त्यहीँ रात साढे ११ बजे आफूलाई बताएकी सांसद उमा रेग्मीले प्रहरीसामू कागज गरिदिएकी छन् ।

त्यस्तै, पत्रकार अजयबाबु सिवाकोटीले गरेको कागज महराविरूद्धको अर्को प्रमाण हो । उनले रोशनीसँग लिएको भिडिओ अन्तर्वार्ता, उक्त भिडिओ लिँदालिँदै महराको नम्बरबाट आएको कल, रोशनीले फर्काएको जवाफलाई पनि प्रमाणको रूपमा मिसिल संलग्न गरेको छ ।

यी सबै तथ्य र प्रमाणका आधारमा सरकारी वकिल कार्यालयले महराविरूद्ध जबर्जस्ती करणी गर्ने प्रयास गरेको आरोप लगाएको हो । पीडितलाई रक्सी खुवाएर अनुचित प्रभावमा पारेर महराले जबर्जस्ती करणी गर्ने प्रयास गरेको सरकारी वकिलको ठहर छ । ‘सभामुखको पदमा आसिन यी प्रतिवादीले आफ्नो पदको दुरूपयोग गरी असोज १२ गते सरकारले उपलब्ध गराएका वरिष्ठ जिम्मेवार सुरक्षाकर्मीहरूलाई निवासबाट बाहिरिँदा सो कुराको यकिन जानकारी नदिइ आफ्नो हैसियतको कुनै हेक्का नराखी, राज्य र आमनागरिकमा पर्ने असरलाई ख्याल नगरी सो संवेदनशीलताप्रति बेवास्ता गरी केही सुरक्षाकर्मीमात्र लिएर साँझ मादकपदार्थ (रक्सी) सेवन गरी साथमा मादकपदार्थ लिइ पीडित एक्लै रहेको निज डेरारकोठामा गई निजलाई जबर्जस्ती मादकपदार्थ सेवन गर्न कर लगाइरगराइ अनुचित प्रभावमा पारी पीडितलाई जबर्जस्ती करणी गर्न खोजेको अवस्थामा पीडितले प्रतिकार गर्दा निजलाई कुटपिटसमेत गरी घाइते बनाइ जबर्जस्ती करणी उद्योगको कसूर गरेकाले,’ अभियोगपत्रमा भनिएको छ, ‘सम्माननीय सभामुखको गरिमामय पदमा आसिन यी प्रतिवादीले आफ्नो पदको दुरूपयोग गरी मुलुकी अपराध संहिता २०७४को दफा २१९ को उपदफा १ र २ र सोही संहिताको दफा ३४ बमोजिम जबर्जस्ती करणी उद्योगको कसूर प्रमाणित हुन आयो ।’ सभामुखको हैसियतमा रहेका व्यक्तिले कसूर गर्दा कसूरको गम्भीरता बढेको पनि अभियोगपत्रमा उल्लेख छ ।

‘मुलुकी अपराध संहिता २०७४ को दफा ३८ को देहाय (घ) बमोजिम कसूरको गम्भीरता बढाउने अवस्थाको भएको’ भन्दै जबर्जस्ती करणी उद्योगमा हुने सजायको डेढी सजाय हुने सरकारी वकिलको माग दाबी छ । १९ वर्षभन्दा माथिकी महिलामाथि जबर्जस्ती करणी (बलात्कार) भए कसूरदारले ७ देखि १० वर्षसम्म कैद सजाय पाउँछन् । जबर्जस्ती करणी उद्योग (बलात्कार प्रयास) मा भने त्यसको आधा सजाय हुन्छ । अर्थात् साढे तीनदेखि साढे पाँचवर्षसम्मको सजाय हुन्छ । त्यसमा डेढी कैद सजाय जोडेर झन्डै साढे पाँचदेखि साढे सात वर्षसम्मको कैद सजाय माग गरिएको हो ।

महरा असोज १२ गते बा२०च ५७११ नम्बरको सिल्भर कलरको गाडी चढेर रोशनीको कोठामा पुगेको सिसिटिभी फुटेजमा देखिएको र आफूकहाँ आएर महराले जबर्जस्ती करणी प्रयास गरेको संसद् सचिवालयमा कार्यरत कर्मचारी रोशनी शाहीले जाहेरीमा उल्लेख गरेकी छिन् । यो घटना बाहिर आएपछि महराले सभामुखबाट राजीनामा दिएका थिए ।

Leave a Reply

Your email address will not be published. Required fields are marked *

Next Post

नयाँ प्रदेश प्रमुखलाई सपथ

१९ कार्तिक २०७६, मंगलवार ०९:४५
काठमाडौं कात्तिक १९, : सातै प्रदेशका नवनियुक्त प्रदेश प्रमुखले पद तथा गोपनियताको सपथ लिएका छन्। मंगलबार बिहान राष्ट्रपति कार्यालय शितल निवासमा राष्ट्रपति विद्यादेवी भण्डारीले नयाँ प्रदेश प्रमुखलाई सपथ खुवाएकी हुन्। सरका रको सिफारिसमा सोमबार राष्ट्रपति भण्डारीले प्रदेश नम्बर १ मा कास्कीका सोमनाथ अधिकारी प्यासी, प्रदेश नम्बर २ मा बाँकेका तिलक […]